Meeqqanut Ilaqutariinnullu Ingerlatsivik AC-fuldmægtigimik imaluunniit Immikkut Siunnersortimik

Kommuneqarfik Sermersuumi Meeqqanut Ilaqutariinnullu Ingerlatsivimmi stabimut AC-fuldmægtigimik imaluunniit immikkut siunnersortimik qitiusumik inissisimasussamik pissarsiorpoq.

Ingerlatsivimmiipput Oqartussaaffeqarfik, Suliniuteqarfik aamma Stabi.

Stabi maannakkut qulinik sulisoqarpoq pingasunullu agguagaallutik - aningaasaqarnermi aqutsisut, siunnersuisooqatigiit aamma kontorfuldmægtigit. Meeqqanut Ilaqutariinnullu politikki 2025 - 2035 ingerlatsivik tamakkerlugu aqutsinermut ineriartornermullu qitiusumik tunngaviuvoq.

Atorfik piffissaq suliffiusussaq tamakkerlugu suliffiuvoq, stabimi pisortaq qaninnertut qullersarineqarluni. Atorfik stabimi pingaaruteqarluinnarpoq atorfilittallu pisortaa qanimut suleqatigineqarluni. Stabimi pisortap siunersiueqataatut aamma allaffissornikkut ikiortaatut atuuffeqassaatit, tamakkiisumik takunninnermik pilersitsinissamut, suliaqarfinni assigiinngitsuni sulianik ataqatigiissaarinermut akisussaaffeqarlutit aamma suliat pingaarutillit pilersuinerillu piffissaliussat malillugit naammassineqarnissaannik qulakkeerinnillutit.

Uagut pilluta annertunerusumik paasissutissanik pissarsisinnaavutit uani: 

https://sermersooq.gl/kl/department/meeqqanut-ilaqutariinnullu-ingerlatsivik/

Atorfiup imarai:
AC-Fuldmægtigimik imaluunniit Immikkut Siunnersortimik – misilittagaqarluarsinnaasumik –siunnersuisooqatigiinnut ilaasussamik aamma suliassanik arlalinnik uku ataanni suliaqartussamik pissarsiorpugut:

·Paasissutissanut tapertaasunik misissueqqissaarinerit aamma kisitsisinik pingaarutilinnik suliaqarneq tassunga ilanngullugit aningaasaqarnikkut misissueqqissaarinerit

·Suliassanik saqqummiussassat, tusarniaanermut akissuteqaatit killiffiillu pillugit nalunaarusiat oqaatsitigut qaffasissumik pitsaassusillit

·Missingersuusiamut oqallisissiamik, missingersuusiornermik suliaqarneq ingerlaavartumillu missingersuusianik malinnaaviginninneq

·Aningaasaqarnikkut aqutsineq aamma missiliuutinut kiisalu atuinermut nikingassutinillu misissueqqissaarineqataaneq

·Politikkikkut aalajangiussanik malinnaaviginninneq suliniutinillu atuutsitsilerneq

·Suliffeqarfiup iluani periusissaliorneq, najoqqutassiorneq pitsaassutsimillu qulakkeerinninnermi atortussanik suliaqarneq

·Periusissamik ilusilersuineq isumasioqatigiissitsineq, immikkut sammisaqartitsineq workshoppertitsinerlu

·Assigiinngitsunik sulialinnik assigiinngitsunillu suliassaqarfinnik suleqateqarnernik ataqatigiissaarineq

·Aqutsisut naapittarfianik ataatsimiititanillu allatseqarnikkut sullissineq

·Ataqatigiissaarinermut, naammagittaalliutinik suliaqarnermut aamma allagaatinik takunnikkumalluni noqqaassuteqarnermut pingaarnertut akisussaaffeqarneq matumani suliassanik tigooraaneq agguaanerlu, suliassaqarfinnit attuumassutilinnit ilanngussassanik pissarsiniarneq, piffissaliussanik misissuineq suliassallu naammassineqarnissaat piffissarlu eqqorlugu stabimi pisortamut tunniussinermik qulakkeerinninneq.

·Suliassat takkussuuttut

Suliassat stabimi sulisut allat kiisalu ingerlatsivimmi aamma susassaqartut suleqatigisartakkat allat qanimut suleqatigalugit suliarineqassapput. 

Atorfiit ersarissumik, eqqortumik pilersaarusiugaasumillu allattariarsornikkut paasissutissiinermik qulakkeerinninnissamut annertuumik akisussaaffeqarnermik imaqarput – suliffeqarfiup iluani avataanilu – kiisalu patajaatsumik erseqqarissumillu aningaasaqarnikkut aqutsinermut peqataaneq.

Qinnuteqartunut naatsorsuutigisat:

·Inuiaqatigiilerinermut tunngasunik imaluunniit allaffissornermut attuumassutilimmik kandidatitut ilinniagaqartoq

·Suliffeqarfimmik politikkikkut aqunneqartumik misilittagalik – ajornanngippat isumaginninnermut suliassaqarfimmi

·Allattariarsornikkut piginnaasaqarluartoq aamma ajornartorsiutinik ajornakusoortunik ersarissumik aalajangiiffigisassatut oqallisissialiorsinnaasoq

·Aningaasaqarnikkut aqutsinermik, missingersuusiornermik missingersuutinillu malinnaaviginninnermik misilittagalik

·Aaqqissuussaanermi tamanut isiginnilluarsinnaassuseqartoq aamma suliassaqarfiit assigiinngitsut akornanni sulianik ajornakusoortunik ataqatigiissaarilluarsinnaasoq kiisalu piffissaliussanik malinninnissamut qulakkeerinnissinnaasoq.

·Suleqatiginnilluarsinnaasoq aamma aaqqissuussaanermi amerlasuunik soqutigineqartumi isumannaatsumik sulisinnaasoq

Pingaartipparputtaaq:

Inuttut piginnaasat naatsorsuutigisat allaaserinissaat. Ataani allassimasumi siunnersuutit/assersuutit kissaatigisaq pisariaqartitsinerlu malillugit toqqarneqarsinnaapput:

∙Aalajaatsuuneq, pitsaassutsimik ilisimasaqarluarneq immikkuualuttunillu maluginiaasinnaaneq

∙Tamakkiisumik isiginnittaaseqarluni ataatsikkut arlalinnik suliaqarsinnaaneq

∙Allattariarsornikkut oqaluttariarsornikkullu ersarissumik paatsuugassaanngitsumillu attaveqarsinnaaneq

∙Nammineerluni sulisinnaaneq, akisussaassuseqarneq sullissiumatunerlu

∙Sulianut atatillugu eqaatsumik periuseqarneq suliallu agguaanneqartarneranni aaqqiissuteqartuarsinnaaneq

∙Ulloq ulapaarfiugaluarpalluunniit ukkatarinnilluarsinnaaneq ataqatigiissitsilluarsinnaanerlu

∙Tatituujuneq, namminersorluni aallarniiniartarneq, nukissaqarluarneq iliuuseqarsinnaassuseqarneq

∙Suliassatta naammassineqarnissaannut ineriartortitseqataanermut pitsanngorsaanermullu peqataaneq

∙Kisitsisilerillaqqissoq

∙Siammasissumik suleqateqarluarsinnaaneq

∙Marluinnik oqaaseqartuuneq, kalaallisut qallunaatullu, iluaqutaassaaq tamannali piumasaqaataanngilaq.

Neqeroorutigaavut:

·Atorfiit pingaarutillit ineriartortitsiffiusut annertuumik sunniuteqarfiusut

·Suliffik suliatigut anguniagaqarfiusoq tunniusimasunik sulisulik

·Politikkikkut allaffissornermilu ingerlarsorfiusunik paasisaqarneq

·Meeqqanut ilaqutariinnullu suliassaqarfimmi ineriartortitsinermut sunniuteqarnissamut periarfissaqarneq

·Misissueqqissaarinermut, suliniummik aqutsinermut aamma pilersaarusiornermik tapertaanermut suliatigut ineriartornissamut periarfissaqarluarneq

Stabimi sulisunut amerlanngitsunut ilanngutissaatit, tassani suleqatigiinneq, suliatigut siunersiueqatigiinneq pitsaassuserlu ukkatarineqarput.

Pineqaatissinneqarsimannginnermut aamma meeqqanik innarliisimannginnermut uppernarsaatit:

Atorfik una meeqqanik innarliisimannginnermut aamma pineqaatissinneqarsimannginnermut uppernarsaatinik pissarsinissamut piumasaqaateqarfiuvoq. Inatsit naapertorlugu kommune meeqqanik pinerliisimannginnermut aamma pineqaatissinneqarsimannginnermut uppernarsaatinik naammaginartutut isigineqartunik pissarsereerpat atorfinitsitsiniarneq aallartinneqarsinnaavoq. Taamaattumik maluginiaqquarput, atorfinitsitsineq aatsaat isumaqatigiissutigineqarsinnaammat kommune rigspolitiinit pineqaatissinneqarsimannginnermut aamma Politiinit meeqqanik innarliisimannginnermut uppernarsaatinik tigusaqarpat.

Meeqqanik innarliisimannginnermut uppernarsaat kommunimit pissarsiarineqassaaq qinnuteqartup akuersissuteqarneratigut, pineqaatissinneqarsimannginnermullu uppernarsaat nammineerluni Politiinit pissarsiarineqassaaq.

Akissarsiatigut atorfinitsitsinermilu atugassarititaasut:

Akissarsianut aamma atorfininnermi atugassarititaasunut tunngatillugu Naalakkersuisunik isumaqatigiissutit atuuttut malinneqassapput, piffissami atorfiniffiusumi Naalakkersuisut kattuffiullu isumaqatiginninniarsinnaatitaasup akornanni isumaqatigiissutit atuuttut naapertorlugit.

Qaammatini pingasuni misiliummik atorfinitsitsisoqassaaq.

Atorfinikkiartornermi angalaneq:

Sulisumut taassumalu ilaqutaanut atorfinikkiartornermi aammattaaq siusinnerpaamik ukiut pingasut qaangiutsillugit soraarnermi angalasinnaatitaaneq atuuppoq soorluttaaq malittarisassat atuuttut naapertorlugit nuunnermi aningaasartuutinut matussutissat ilinnut tunniunneqarumaartut.

Atorfinitsitsilluni periuserineqartoq malillugu ataatsimoortunut sillimmasiineq pillugu immikkut isumaqatigiissuteqarneq ilaavoq.

Ineqarneq:
Atorfimmut atatillugu inimik innersuussisoqarsinnaanngilaq

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit:

Suleqatigiinnut aqutsisoqBruno Heilmann, oqarasuaat +299 55 36 10 imaluunniit e-mail: ks40brhe@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 689-26-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqassaatit:

Qinnuteqaatit elektroniskimik nassiunneqassapput, quppernermi matumani allerpaami innersuussaq toorukku qinnuteqaatit CV-llu kakkiullugit nassiussinnaavatit.

Malugiuk:

Qinnuteqaatit pappilianngorlugit mailikkulluunniit tiguneq ajorpavut, qinnuteqaatit sulisussarsiorneq aqqutigalugu nassiunneqarnissaat inussiarnersumik piumasarineqarpoq.

Qinnuteqarnissamut killissarititaasoq: aggustip 13.-at, 2026